Hatutan.com, (04 Dezembru 2021), Dili—Iha Sesta 03 Dezembru dadersan, família hetan mate-isin Carlos Pires ho idade (67) ne’ebé mate mistériu no latan-hela iha rai iha área Makin, aldeia Tuqueten, Suku Cribás, Postu Administrativu Manatuto Vila.
Komunidade hamutuk ho Polisia foti
Mate-isin Veteranu Carlos Pires.
Foto/Facebook.
Xefe Suku Cribás, Eurico Alves, haktuir kronolójia katak, iha Sesta tuku 08:00 Otl, matebian Carlos Pires sai hosi nia uma, dehan atu ba haree nia animál hanesan Karau Timor ne’ebé durante haki’ak iha área aldeia ne’e.
Infelizmente, situasaun sai oin seluk, tanba feto faluk ho família tomak rona dehan katak, sira nia maun, alin, Carlos Pires ho kondisaun iis-kotu ona, ne’ebé latan hela iha rai fuik, área Cribás.
“Nia mate, bainhira atu ba haree karau iha sorin hosi rai ne’ebé naran Makin. Entaun, nia subriñu ida bá, hetan hela nia mate-isin iha ne’ebá. Nia subriñu ne’e mai fó hatene fali nia ferik oan, depois subriñu ne’e ho matebian nia ferik oan mai hateten fali ami iha ne’e mak ha’u orienta joven sira ho komunidade tun ba haloot lori mai uma,” Xefe Suku Cribás, Eurico Alves, informa ba hatutan.com via telefónika, Sábadu (04/12/2021).
Hafoin to’o iha fatin akontesimentu, Xefe Suku Eurico, kontakta diretamente ba Komandu Polísia Nasionál Timor-Leste (PNTL), liuhosi Komandu Munisípiu Manatuto, Komandante eskuadra ho ekipa hosi investigasaun to’o kedan iha Cribás, hodi halo identifikasaun ba fatin ne’e, liu-liu buka hatene kona-bá kronolojia ka kauza hosi nia mate.
“Nia mate kuaze iha tuku 14:00 no alin mane ne’e hetan nia mate-isin iha tuku 18:00. Depois ami foti ne’e kalan ona,” Xefe Suku Cribás, konta tuir tán.
Bainhira Komandu PNTL Munisipiu Manatuto, liuhosi ekipa investigasaun kriminál, konklui identifikasaun parte autoridade seguransa no komunidade sujere atu lori matebian nia isin mate, ba hala’o autópsia, nune’e bele hatene ninia rezultadu. Maibé, parte família husu atu labele halo tán autópsia no hala’o funébre de’it tuir kultura.
“Tanba família matebian la konkorda, entaun familia husu fila-fali nia mate-isin, lori mai atu haloot tuir lisan no beran ne’ebé mak iha Barique ninian,” subliña.
Matebian nu’udár kaben na’in maibé seidauk iha oan. Matebian rasik mós hanesan veteranu ida ho grau 8-14 no durante ne’e simu hela pensaun veteranu to’o hakotu-iis.
Parte autoridade iha Cribás nian informa ona ba responsável Konsellu Veteranu iha Munisipiu Manatuto atu bele fó apoia kaixaun hodi tau mate-isin.
“Sim, nia mós veteranus ida, no ativu hela hodi simu pensaun veteranu,” Xefe Suku Eurico, informa.
Tuir planu, família hamutuk ho reprezenta veteranu Munisipiu Manatuto sei hala’o sermónia funébre hodi haloot matebian nia mate-isin tuir lisan Barique nian, iha Aldeia Tuqueten, Suku Cribás, Postu Administrativu Manatuto Villa, iha Domingu 05 Dezembru 2021, tuku 10:00 dadeer.
To’o notísia ne’e publika, Jornalista Hatutan.com tenta beibeik hodi konfirma ho Komandante PNTL Munisípiu Manatuto via telefónika, maibé númeru kontaktu Komandante “fora da área de cobertura”.