Manatuto—17-04-2026, Prezidente da Autoridade Munisipal de Manatuto Sr.Luis Inacio Henrique Fernandes, Akompanha husu Secam Asunto Sosiais Natalino Martins Carvalho, Secam PIDI Domingas Gilpia, Secam AF, Patricio da Cruz Quintão hamutuk ho autoridáde lokal sira iha Munisípiu Manatuto hala’o enkontru importante ida atu forma komisaun organizadóra ba selebrasaun loron istóriku 20 de Maiu no mos Aniversáriu CPLP (Komunidade dos Países de Língua Portuguesa).

Enkontru ne’e realiza iha Salaun PNDS Munisipiu Manatuto ne’ebé partisipa hosi reprezentante governu lokal, lideransa komunitária, juventude, PNTL no entidade relevante sira seluk. Objetivu husi enkontru ne’e mak atu prepara no organiza didiak atividade sira atu marka loron importante rua ne’e.

Iha diskusaun ne’e, partisipa sira konkorda atu kria komisaun ida ho estrutura klaru, inklui seksaun organizasaun, logistika, siguransa, no programa. Komisaun ne’e sei responsabiliza atu asegura katak preparasaun hotu-hotu lao ho di’ak no tuir planu ne’ebé estabelese ona.

Prezidente da Autoridade Munisípiu Manatuto hateten katak selebrasaun 20 de Maiu mak momentu importante atu hametin unidade nasional no valoriza luta povu Timor-Leste nian. Nune’e mos, aniversáriu CPLP sai oportunidade atu hametin relasaun entre nasaun sira ne’ebé uza língua Portugés.

Tuir planu, atividade sira sei inklui serimónia ofisiál, programa kultural, desportu, no atividade edukativu sira ne’ebé envolve komunidade tomak.

Ho forma komisaun ida ne’e, espera katak selebrasaun tinan ida ne’e sei lao ho susesu no partisipa ativu hosi povu iha Munisípiu Manatuto.

#MEDIA PAM MANATUTO