Manatuto- 04-07-2025 Prezidenti da Autoridade Munisipal de Manatuto Sr.Luis Inacio Henrique Fernandes Partisipa Komemorasaun Loron Nasional Ema ho Difisiensia, iha Resintu Edifisiu Sentru Solidaridade Sosial no Inkluzaun Munisipiu Manatuto.

Governu Konstitusionál da-9 liuhusi Ministériu Solidariedade Sosiál no Inkluzaun (MSSI), hamutuk ho Embaixadóres liñas ministeriais sanulu resin tolu (13), Ema ho Defisiénsia (EhD) ho sira-nia família, inklui parseirus UN Women, UN PRPD, UN Human Rights, no UNICEF, komemora Loron Nasionál EhD Iha Munisípiu Manatuto.

Iha komemorasaun ne’e, Reprezentante SE Prezidente Repúblika, atuál Xefe Kaza Sivil Prezidente Repúblika, Jesuína Maria Ferreira Gomes, hato’o mensajen iha selebrasaun ne’e katak, Estadu valoriza ema hotu-hotu inklui EhD, nu’udar pilar importante iha prosesu dezenvolvimentu. Tanba ne’e SE Prezidente Repúblika hato’o parabens ba maluk sira ho kondisaun espesiál hotu iha Timor-Leste.

Prezidente Repúblika mós apresia MSSI, tanba ho lideransa Ministra MSSI, Verónica das Dores inklui Vise-Ministra, Céu Brites nian, EhD sira komesa prepara an di’ak liután hodi partisipa iha prosesu dezenvolvimentu ida-ne’ebé la husik ema ida iha kotuk.

Entretantu Ministra MSSI hato’o apresiasaun ba esforsu koletivu MSSI ho liñas ministeriais hotu, ho apoiu husi parseirus nian, maka iha fulan Juñu tinan 2025, Estadu Timor-Leste hato’o ona Relatóriu implementasaun Konvensaun Direitus EhD ba Organizasaun Nasoins Unidas (ONU) iha Nova Iorke.

Iha komemorasaun ne’e, MSSI mós apoiu Foos no ai-han komplementár ba EhD sira ne’ebé partisipa. Antes ne’e husi 1-3 Jullu 2025, Ministra hala’o vizita domisiliáriu ba EhD iha Postu Soibada, Lakló no Manatuto Vila, hodi apoiu mós ai-han, hala’o pagamentu subsídiu ba EhD balu no apoiu kadeira roda, CP Car no ekipamentus seluk tan ba EhD balu, tanba sira labele partisipa iha komemorasaun tanba sira-nia kondisaun defisiénsia.

#MEDIA PAM MANATUTO