Manatuto-02-07-2025—Xefi Gabinete Autoridade Munisipiu Manatuto Hendrik Soekendro,Representa Prezidenti da Autoridade Munisipal Manatuto Akomapinha Ministra Solidariedade Sosiál no Inkluzaun, Verónica das Dores,Vizita Domisiliariu ba Ema Ho Difisiensiesian iha Postu Laclo, Quarta Feira Semana ne’e, Ministra Solidariedade Sosial no Inkluzaun,Veronica das Dores, husu ba família sira atu trata membru família ka oan ne’ebé defisiénsia ho domin, tanba defisiénsia ne’ebé oan hetan nu’udar vontade Maromak Nian.

“Apa ho ama labele hirus oan defisiénsia, ba sá Maromak fó ba sira kondisaun hanesan ne’e, tanba Maromak iha planu no domin ne’ebé boot liu ba sira. Nune’e hanesan inan-aman presiza agradese ba Maromak tanba Maromak hadomi liu sira”, katak Ministra bainhra hala’o vizita domisiliáriu ba ema ho defisiénsia no ema vulnerável na’in 14 husi Suku Lacumesac, Hohorai, Uma Naruc no Iliheu, iha Postu Administrativu Lacló, Munisípiu Manatuto.

Entretantu Xefe Suku Lacumesac, Luis Mendonça hatete, vizita Ministra MSSI ba iha Aldeia Labubo, Suku Lacumesac, nu’udar vizita dahuluk membru governu ba iha Aldeia refere desde Independénsia. “Ami agradese ba Ministra tanba mesmu estrada aat, maibé Ministra hakarak mai vizita povu kbiit-laek sira. Tanba desde uluk to’o agora foin membru governu ida mai vizita ami-nia Suku ne’ebé mak iha foho leten baliza ho Postu Administrativu Remexio, Munisípiu Aileu”, katak Luis.

Iha vizita ida-ne’e, Ministra mós lori kedas ho ekipa pagamentu husi Banku Nasionál Komérsiu Timor-Leste (BNCTL-sigla Portugés) hodi halo pagamentu ba defisiénte ne’ebé toba de’it iha fatin. Tanba Ministra rasik hatete, ba ema ho defisiénsia ka idozus sira ne’ebé moras ka iha kondisaun labele halo viazen, BNCTL ho ekipa MSSI sei la’o to’o benefisiáriu sira-nia uma hodi realiza pagamentu.

Vizita domisiliáriu ida-ne’e realiza iha ámbitu Komemorasaun Loron Nasionál Ema ho Defisiénsia, ne’ebé monu iha 4 Jullu kada tinan. Iha tinan kotuk, MSSI komemora loron ida-ne’e iha Munisípiu Liquiça. Iha tinan ida-ne’e MSSI komemora fali iha Munisípiu Manatuto, ne’ebé hahú ho atividade vizita domisiliáriu ba ema vulnerável iha áreas remotas iha Postu Administrativu Soibada no Postu Administrativu Lacló, Munisípiu Manatuto.

#MEDIA PAM MANATUTO