Ministériu Solidariedade Sosiál no Inkluzaun (MSSI) selebra Natál hamutuk ho komunidade Ilimanu, knua Museu, Suku Uma Kaduak, Postu Administrativu Laclo, Munisípiu Manatuto, iha Sábadu kalan no misa agradesimentu iha Domingu (20–21/12/2025).

Iha selebrasaun ne’e, Ministra MSSI, Verónica das Dores ho komitiva entrega parsel Natál no Tinan Foun 2026 nian ba komunidade, no mós apoiu ai-han hanesan forma solidariedade no partilla. Atividade ne’e parte husi esforsu ministériu atu fó alegria ba komunidade iha tempu Natál no Tinan Foun, no hatudu valor solidariedade, inkluzaun, hametin ligasaun entre Governu ho povu. Komunidade Ilimanu simu ekipa Ministra ho nia komitiva ho tebe dai no lian dadoli, ne’ebé kria atmosfera alegria no nakonu ho esperansa

“ai-han oituan ne’ebé ami distribui, maski nia valor ne’e kiik, maibé ami fó ho fuan no domin. Respeitu ba Eróis Vivus sira, tanba sira mak determina ukun-an ida-ne’e. Ami nia prezensa la’ós deit atu halo distribuisaun ai-han, maibé mós atu hatene moris komunidade sira nian.

“MSSI sei kontinua servisu hamutuk ho autoridade lokál no igreja, hodi fó apoiu ba komunidade sira, tuir nesesidades ne’ebé iha. Ha’u sei hala’o vizita ba bairo Limbaba, ne’ebé do’ok tebes no lori oras 6 ou 7 mak foin to’o. Maski do’ok maibé ha’u hakarak vizita”, tenik Ministra.

Ikus liu, Ministra fó dezeju Natal 2025 no Tinan Foun 2026 ba komunidade Ilimanu, espesiál ba knua Museu.

Iha fatin hanesan, Prezidente Autoridade Manatuto, Luis Fernandes hatete, Prezensa Ministra ho komitiva iha Museu, hanesan surpréza boot ida. Komunidade sente onradu tebes, tanba presiza esforsu boot atu mai to’o iha fatin ne’ebé do’ok tebes. Maski distansia ne’e do’ok, maibé Ministra nafatin hili fatin ida-ne’e hodi selebra Natál hamutuk ho komunidade Museu, hanesan prova nia kompromisu atu hametin solidariedade no inkluzaun.

Xefe Suku Ilimanu, Fermino Ribeiro da Cruz hato’o agradesimentu ba Ministra ho komitiva, tanba bele hala’o vizita hodi fó haksolok ba komunidade Ilimanu iha ámbitu selebrasaun Natál no Tinan Foun. Durante tempu ukun-an seidauk iha membru Governu ida mai hala’o vizita ba komunidade Ilimanu, espesiál komunidade Museu, no promesa ne’ebé Ministra hato’o iha vizita dahuluk sai duni realidade katak nia sei mai fali hodi selebra Natál hamutuk ho komunidade sira, dehan Xefe Suku Ilimanu.

Selebrasaun Natál hamutuk ne’e taka ho Misa ne’ebé prezide husi Pe. Francisco Siqueira, hanesan Vigario Paroquia Laclo no distribui mós parsel Natál no tinan foun nian ba komunidade sira.

Partisipa iha selebrasaun Natál hamutuk ne’e mak, Diretores Jerais, Diretores Nasionais no Munisipais, Xefe Departamentu, Xefe Seksaun no Funsionárius inklui Asesor.

Mídia MSSI