𝐌𝐀𝐍𝐀𝐓𝐔𝐓𝐎, 𝟐𝟒 𝐌𝐀𝐑𝐒𝐔 𝟐𝟎𝟐𝟔 – Prezidente da Autoridade Munisipal de Manatuto Sr.Luis Inacio Henrique Fernandes akompanha Sekretáriu Estadu Peskas, 𝐃𝐫. 𝐃𝐨𝐦𝐢𝐧𝐠𝐨𝐬 𝐝𝐚 𝐂𝐨𝐧𝐜𝐞𝐢çã𝐨 𝐝𝐨𝐬 𝐒𝐚𝐧𝐭𝐨𝐬 “𝐌𝐚𝐮-𝐜𝐚𝐫𝐨”, tersa ne’e lansa atividade Tara Bandu Tasi hamutuk ho komunidade peskadór sira iha Suku Uma-caduac, Postu Administrativu Laclo, Munisípiu Manatuto.

Serimónia ida ne’e organiza hosi Ajénsia Blue Venture ho objetivu atu hametin protesaun no konservasaun rekursu tasi sira, liu-liu ikan no biota marinha seluk, hodi garante sustentabilidade ambientál no ekonomia ba komunidade peskadór sira iha área refere.

Tara Bandu Tasi ne’e hanesan mekanizmu tradisionál ne’ebé importante atu regula atividade peska, prevene prátika ilegal hanesan peska ho bomba ka venenu, no promove utilizasaun rekursu naturál ho forma responsável.

Iha intervensaun, Sekretáriu Estadu Peskas nian, hateten Governu kontinua fó apoiu ba inisiativa lokál sira ne’ebé envolve partisipasaun komunidade atu jere rekursu naturál sira ho di’ak.

Nia mós haktuir, kolaborasaun entre Governu, autoridade lokál no komunidade mak sai fator importante atu asegura susesu implementasaun Tara Bandu Tasi iha terenu.

Prezidente da Autoridade Munisipal nian hak tuir Governu valoriza tebes atividade tradisionál hanesan Tara Bandu tanba bele ajuda proteje ita-nia rekursu tasi no asegura katak jerasaun oin sei bele aproveita nafatin,” tamba ne’e husu ba Komunidade sira nebe Pertense iha area refere tenki Garante Tasi mos,labele soe foer ba iha tasi atu nune labele estraga Ita nia Rikusoin tasi.dehan PAM

Autoridade lokál no lideransa komunidade iha Suku Uma-caduac mós hatudu sira-nia kompromisu atu implementa no respeita regra sira ne’ebé estabelese iha Tara Bandu Tasi, hodi asegura katak rekursu tasi sira bele utiliza ho forma sustentável no benefisia komunidade tomak.

Serimónia lansamentu ne’e remata ho atividade kultural no asinatura kompromisu husi parte relevante sira, hanesan simbolu unidade no responsabilidade hamutuk atu proteje no prezerva tasi ba futuru Timor-Leste.

Partisipa iha serimónia ne’e mak Prezidente Autoridade Munisípiu Manatuto, Administradór Postu Administrativu Laclo, reprezentante hosi Ambiente, Autoridade Seguransa no Defesa, Autoridade komunitáriu, no entuziasmu hosi komunidade peskadór sira, iha área refere.

#MEDIA PAM MANATUTO