𝐏𝐑𝐄𝐙𝐈𝐃𝐄𝐍𝐓𝐄 𝐀𝐔𝐓𝐎𝐑𝐈𝐃𝐀𝐃𝐄 𝐌𝐔𝐍𝐈𝐒𝐈́𝐏𝐈𝐔 𝐌𝐀𝐍𝐀𝐓𝐔𝐓𝐎, 𝐒𝐑.𝐋𝐔𝐈𝐒 𝐈𝐍𝐀𝐂𝐈𝐎 𝐇𝐄𝐍𝐑𝐈𝐐𝐔𝐄 𝐅𝐄𝐑𝐍𝐀𝐍𝐃𝐄𝐒 𝐀𝐊𝐎𝐌𝐀𝐏𝐈𝐍𝐇𝐀 𝐒𝐔𝐀 𝐄𝐗𝐄𝐋𝐄́𝐍𝐒𝐈𝐀 𝐌𝐈𝐍𝐈𝐒𝐓𝐑𝐔 𝐀𝐃𝐌𝐈𝐍𝐈𝐒𝐓𝐑𝐀𝐒𝐀𝐔𝐍 𝐄𝐒𝐓𝐀𝐓𝐀́𝐋 𝐒𝐑.𝐓𝐎𝐌𝐀𝐒 𝐃𝐎 𝐑𝐎𝐒𝐀𝐑𝐈𝐎 𝐂𝐀𝐁𝐑𝐀𝐋, 𝐊𝐈𝐍𝐓𝐀 𝐒𝐄𝐌𝐀𝐍𝐀 𝐍𝐄’𝐄, 𝐇𝐀𝐋𝐀’𝐎 𝐕𝐈𝐙𝐈𝐓𝐀 𝐁𝐀 𝐅𝐀𝐓𝐈𝐍 𝐁𝐀𝐋𝐊𝐀𝐔𝐍 𝐔́𝐍𝐈𝐊𝐔, (𝐁𝐔́) 𝐈𝐇𝐀 𝐌𝐔𝐍𝐈𝐒𝐈́𝐏𝐈𝐔 𝐌𝐀𝐍𝐀𝐓𝐔𝐓𝐎

Manatuto—03-07-2025 — Prezidente Autoridade Munisípiu Manatuto, Sr.Luis Inacio Henrique Fernandes Akomapinha Sua Exelénsia Ministru Administrasaun Estatál, Sr.Tomas Do Rosario Cabral, kinta semana ne’e, hala’o vizita ba fatin Balkaun Úniku, (BÚ) iha Munisípiu Manatuto.

Vizita ne’e ho objetivu atu observa progresu atualizasaun dadus populasaun nian no prestasaun servisu atendimentu públiku ba sidadaun sira iha fatin refere, ne’ebé hala’o ona durante tinan-ida, dezde inaugurasaun ofisial husi Sua Exelénsia Primeiru-Ministru, 𝐊𝐚𝐲 𝐑𝐚𝐥𝐚 𝐗𝐚𝐧𝐚𝐧𝐚 𝐆𝐮𝐬𝐦𝐚̃𝐨, iha loron 04 fulan-maiu tinan 2024.

Nu’udar parte ida husi Timor-Leste nia preparasaun ba adezaun ASEAN, Sua Exelénsia Ministru subliña importánsia husi transformasaun dijitál “Tanba ita atu tama ba ASEAN, rekizitu xave ida mak dijitalizasaun. Ita sei servisu hamutuk ho TIC hodi estabelese website kada munisípiu hodi halo koneksaun dadus husi Munisípiu ba Nasionál no Sistema Integradu Informasaun Jestaun Dadus Suku no Aldeia (SIIGSA)”.

Iha Dekretu-Lei No. 49/2023, hatuur Balkaun Úniku nu’udar servisu deskonsentradu ida iha Diresaun Jerál Simplifikasaun, Modernizasaun, no Administrasaun Lokál ne’ebé Tutela iha Ministériu Administrasaun Estatal. Nune’e mós iha DL 3/2025 iha DG-SMAL sei asegura instalasaun servisu BU no halo mós jestaun ba servisu BU iha territoriu nasionál hotu. BU mak sentru servisu iha nível lokál iha ne’ebé sidadaun ida-idak bele hetan asesu ba informasaun no asesu ba servisu públiku ne’ebé la hanesan iha fatin ida de’it, nune’e bele poupa tempu no poupa osan.

(BÚ) hanesan mekanizmu ida husi promosaun ba prosesu desentralizasaun ne’ebé espanda tan prestasaun servisu ba atendimentu públiku, hamenus burokrasia hasa’e transparensia, satisfasaun no konfiansa ba administrasaun públika.

Inisiativa ida-ne’e aliña ho esforsu desentralizasaun IX Governu Konstitusional nian iha Balkaun Úniku, (BÚ), ne’ebé eziste ho objetivu tolu,(3) mak hanesan: hakbesik prestasaun servisu ba sidadaun sira; moderniza no simplifika servisu atendimentu ba públiku ho lalais no fasil; no promove transparensia hodi bele lori governasaun di’ak besik liubá povu.

Ministériu Administrasaun Estatál servisu hamutuk ho Programa Nasoins Unidas ba Dezenvolvimentu (UNDP) iha Timor-Leste, hodi implementa inisiativa ida-ne’e, hodi reforsa kooperasaun internasionál hodi haforsa prestasaun servisu públiku.

#MEDIA PAM MANATUTO