Manatuto, 20 Maiu 2026 — Prezidente Autoridade Munisípiu Manatuto, Sr. Luis Inacio Henrique Fernandes, ohin prezide serimónia ofisiál komemorasaun Loron Restaurasaun Independénsia Repúblika Demokrátika Timor-Leste ba dala 24, ne’ebé hala’o ho solene iha Kampu Karlilu, Munisípiu Manatuto.

Komemorasaun Loron Restaurasaun Independénsia ba tinan ida ne’e lori tema: “𝗝𝘂𝗻𝘁𝗼𝘀 𝗖𝗼𝗻𝘀𝘁𝗿𝘂í𝗿𝗲𝗺𝗼𝘀 𝘂𝗺𝗮 𝗣á𝘁𝗿𝗶𝗮 𝗰𝗮𝗱𝗮 𝘃𝗲𝘇 𝗺𝗮𝗶𝘀 𝗷𝘂𝗻𝘁𝗮, 𝗶𝗻𝗰𝗹𝘂𝘀𝗶𝘃𝗮 𝗲 𝗿𝗲𝘀𝗶𝗹𝗶𝗲𝗻𝘁𝗲”, ne’ebé reflete espírito unidade nasional, inkluzaun sosial no kompromisu hamutuk atu kontinua dezenvolve nasaun.

Serimónia hahú ho isár Bandeira Nasionál no kanta Hino Nasionál “Pátria”, nu’udar símbolu patriotizmu, soberania no respeitu ba luta no sakrifísiu herói no heroína sira ne’ebé konsege lori fila fali independénsia ba povu Timor-Leste.

Iha serimónia refere marka prezensa husi Sekretáriu Munisipál sira, Diretór Munisipál sira, reprezentante Delegasaun Teritorial, veteranus, lider relijiozu sira, intelektuais, estudante sira, komunidade Munisípiu Manatuto no funsionáriu tomak Autoridade Munisípiu Manatuto (AMM), ne’ebé partisipa ho espírito nasionalizmu, unidade no fraternidade.

Iha ámbitu komemorasaun ne’e Prezidente Autoridade Munisipál Manatuto, Sr. Luis Inacio Henrique Fernandes , hateten liuhusi diskursu husi Sua Exelénsia Prezidente Repúblika, 𝐉𝐨𝐬é 𝐑𝐚𝐦𝐨𝐬 𝐇𝐨𝐫𝐭𝐚, fó ona mensajem ne’ebe klean tebes-tebes atu fó hanoin fila-fali mai ita hanesan nasaun indepedente durante tinan 24 saida mak ita halo ona no barak mak seidauk, maibé governu esforsu nafatin atu hatutan mehi heroi no heroína sira kombatentes libertasaun nasional sira nian atu povu bele moris ho di’ak no hakmatek.

Nia mos hateten katak independénsia ne’ebé povu Timoroan hetan ho susar no sakrifísiu boot tenke sai inspirasaun ba jerasaun foun sira atu kontinua kontribui ba dezenvolvimentu nasaun, liuhusi edukasaun, disiplina, solidariedade no responsabilidade sosial.

Loron Restaurasaun Independénsia, ne’ebé selebra kada tinan iha loron 20 Maiu, nu’udar momentu istóriku importante ba povu Timor-Leste, tanba iha loron ne’e, iha tinan 2002, Timor-Leste restaura fila fali nia ukun-an hanesan nasaun soberanu no independente iha komunidade internasionál.

Komemorasaun ne’e mos sai hanesan oportunidade atu fó omenajen ba líder no combatente libertasaun nasional sira ne’ebé dedica an tomak ba independénsia no soberania nasaun nian, no ao mesmo tempu hametin espírito unidade entre povu Timoroan sira hodi kontinua hari’i Timor-Leste ne’ebé forte, demokrátiku no sustentável ba futuru.

Iha ambito Komemorasaun ne’e Autoridade Munisipal Manatuto Liu husi Direção Nacional dos Registos e Notariado Entrega sertifikadu propriedade ba nain rai hamutuk ema nain-4 iha Munisípiu Manatuto. Atividade ne’e nu’udar parte husi esforsu Governu atu garante seguransa jurídika no legalidade ba propriedade rai komunidade nian.

Iha serimónia refere marka prezensa husi Sekretáriu Munisipál sira, Diretór Munisipál sira, reprezentante Delegasaun Teritorial, Apa Postu Manatuto Villa, veteranus, lider relijiozu , intelektuais, Cefi Suku estudante,komunidade Munisípiu Manatuto no funsionáriu tomak Autoridade Munisípiu Manatuto (AMM), ne’ebé partisipa ho espírito nasionalizmu, unidade no fraternidade.

#MEDIA PAM MANATUTO