Manatuto, 28 Abril 2026 — Dosente husi Faculdade Economia no Gestão, Sr. Apolinari Magno, lori estudante sira husi Universidade Nacional Timor Lorosa’e (UNTL) mai entrega ofisial iha Autoridade Munisipal Manatuto hodi hala’o programa estájiu durante fulan rua.

Programa ne’e realiza ho objetivu atu fó oportunidade ba estudante sira hodi aplika koñesimentu teóriku iha prátika servisu públiku, nune’e mos atu hasa’e kapasidade profisionál no haburas esperiénsia iha área jestaun no administrasaun.

Prezidente da Autoridade Munisipal Manatuto Sr.Luis Inacio Henrique Fernandes akompanha husi Secam Asuntos Sosiais simu inisiativa refere no afirma katak programa estájiu importante tebes ba dezenvolvimentu rekursu umanu, liu-liu ba jovem sira ne’ebé prepara an atu tama iha merkadu traballu.

Aleinde ne’e, programa estájiu ne’e espera bele kontribui ba fortalesimentu kooperasaun entre instituisaun ensinu superior no governu lokal, no mos fó benefísiu ba melhoria servisu administrativu iha munisípiu.

Estudante estajiáriu sira hamutuk ema 21, kompostu husi mane 8 no feto 13, mai husi departamentu tolu iha Faculdade Economia no Gestão UNTL.

#MEDIA PAM MANATUTO