Formasaun ne’ebé hala’o iha Salaun Administrasaun Munisipal Manatuto ne’e ho tema “𝐅𝐨𝐫𝐦𝐚𝐬𝐚𝐮𝐧 𝐏𝐫𝐨𝐟𝐢𝐬𝐢𝐨𝐧𝐚𝐥 𝐛𝐚 𝐊𝐚𝐫𝐠𝐮 𝐗𝐞𝐟𝐢𝐚 𝐇𝐨𝐝𝐢 𝐑𝐞𝐟𝐨𝐫𝐬𝐚 𝐊𝐚𝐩𝐚𝐬𝐢𝐝𝐚𝐝𝐞 𝐅𝐮𝐧𝐬𝐢𝐨𝐧𝐚𝐦𝐞𝐧𝐭𝐮 𝐒𝐞𝐫𝐯𝐢𝐬𝐮 𝐋𝐨𝐤𝐚́𝐥 𝐢𝐡𝐚 𝐍𝐢́𝐯𝐞𝐥 𝐌𝐮𝐧𝐢𝐬𝐢𝐩𝐚𝐥 𝐧𝐨 𝐊𝐨𝐧𝐭𝐫𝐢𝐛𝐮𝐢 𝐛𝐚 𝐆𝐨𝐯𝐞𝐫𝐧𝐚𝐬𝐚𝐮𝐧 𝐍𝐞’𝐞𝐛𝐞́ 𝐄𝐟𝐞𝐭𝐢𝐯𝐮”.

Iha intervensaun, Diretór Jerál Desentralizasaun no Governu Lokál, esplika katak inisiativa ida-ne’e reflete Governu Sentrál nia kompromisu ne’ebé la’o hela atu fó asistensia autoridade munisípiu sira bazeia ba Dekretu Lei N.° 84/2023 fulan Novembru ne’ebé prosede ba 𝑄𝑢𝑖𝑛𝑡𝑎 𝐴𝑙𝑡𝑒𝑟𝑎𝑐̧𝑎̃𝑜 dekretu-lei n.º 3/2016, loron 16 fulan Marsu, kona-ba Estatutu Administrasaun Munisipal, Autoridade Munisipal no Grupu Tékniku Interministerial ba Desentralizasaun Administrativa no Resolusaun Governu No 6/2025, 10 fevereiru, ne’ebé ko’alia kona-ba ezekusaun estratégia Desentralizasaun Administrativa no Instalasaun Orgaun Reprezentativu Poder Lokál 2025-2028.

Diretór Jerál ne’e hatutan, prioridade ba tinan ida ne’e foka ba formasaun, hanesan hatuur iha Rezolusaun No. 6/2025, 10 fevereiru, katak kontinua kapasita funsionáriu munisipal sira nian to’o tinan 2026. Esforsu ida ne’e hanesan parte ida husi preparasaun atu kumpre kondisaun mínimu ne’ebé ezije ba avaliasaun.

Tamba ne’e, Diretór Jerál António Augusto Guterres husu ba autoridade munisípiu Manatuto tenki esforsa an hodi bele preparadu iha termu administrasaun Finansas, Aprovizionamentu, Planeamentu no Patrimóniu, atu bele prienxe kondisaun mínima hodi hakat ba poder lokál.

Formasaun ba Kargu Xefia sira hala’o durante loron rua, hahú husi loron 2 toó 3 fulan setembru, enkuantu formasaun ba tekniku administrativu sira sei hala’o mós durante loron rua, hahú husi loron 4 to’o 5 fulan Setembru

Aktividade formasaun hetan partisipasaun husi Sekretariu Munisipal sira, Administradór Postu Administrativu, Diretór Munisipal no Xefe Departamentu sira.

#MEDIA PAM MANATUTO