𝙈𝒂𝙣𝒂𝙩𝒖𝙩𝒐—12-12-2025——𝑫𝙞𝒔𝙠𝒖𝙧𝒔𝙪 𝙝𝒖𝙨𝒊 𝑺𝙪𝒂 𝑬𝙭𝒆𝙡𝒆́𝙣𝒔𝙞𝒂 𝑷𝙧𝒆𝙯𝒊𝙙𝒆𝙣𝒕𝙚 𝘼𝒖𝙩𝒐𝙧𝒊𝙙𝒂𝙙𝒆 𝑴𝙪𝒏𝙞𝒔𝙞𝒑𝙖́𝒍 𝑴𝙖𝒏𝙖𝒕𝙪𝒕𝙤 𝑆𝑟. 𝐿𝑢𝑖𝑠 𝐼𝑛𝑎𝑐𝑖𝑜 𝐻𝑒𝑛𝑟𝑖𝑞𝑢𝑒 𝐹𝑒𝑟𝑛𝑎𝑛𝑑𝑒𝑠 𝒂𝙗𝒆𝙧𝒕𝙪𝒓𝙖 𝙎𝒆𝙨𝒂𝙪𝒏 𝑨𝙫𝒂𝙡𝒊𝙖𝒔𝙖𝒖𝙣 𝙆𝒐𝙣𝒅𝙞𝒔𝙖𝒖𝙣 𝙈𝒊́𝙣𝒊𝙢𝒂 𝒃𝙖 𝘼𝒅𝙢𝒊𝙣𝒊𝙨𝒕𝙧𝒂𝙨𝒂𝙪𝒏 𝑴𝙪𝒏𝙞𝒔𝙞́𝒑𝙞𝒖 𝑴𝙖𝒏𝙖𝒕𝙪𝒕𝙤

Ohin, ita halibur hamutuk atu hahú prosesu avaliasaun kondisaun mínimu sira ba objetivu implementasaun desentralizasaun poder lokál iha Munisípiu Manatuto Ida-ne’e nu’udar pasu krítiku ida hodi garante katak Munisípiu Manatuto prontu no iha kapasidade atu simu responsabilidade foun ne’ebé mai ho transferénsia podér husi governu sentrál ba nível lokál.

Polítika IX Governu Konstitusionál nian mak atu prepara munisípiu sira hodi simu transferénsia desentralizasaun poder lokál. Tanba ne’e, Ministériu Administrasaun Estatál (MAE) nomeia ekipa ida atu vizita munisípiu sira hodi halo avaliasaun jerál kona-ba kondisaun mínimu ne’ebé munisípiu sira prenxe ona.

Objetivu prinsipál husi avaliasaun ida-ne’e mak atu identifika no avalia kapasidade institusionál, rekursu umanu, rekursu finanseiru, no infraestrutura ne’ebé eziste ona iha Munisípiu Manatuto hodi suporta prosesu desentralizasaun.

Importánsia no Benefísiu ba Administrasaun Munisipál Manatuto

Identifikasaun Kapasidade no Dezafiu: Avaliasaun ida-ne’e sei permite ita atu halo diagnóstiku ida ne’ebé klean kona-ba forsa no frakeza sira iha administrasaun munisipál. Ita sei bele identifika área sira ne’ebé presiza melloria no dezenvolvimentu, hanesan kapasitasaun rekursu umanu, hadi’a jestaun finanseira, no reforsa infraestrutura.

Preparasaun ba Transferénsia Podér: Desentralizasaun la’ós de’it kona-ba transferénsia responsabilidade, maibé mós kona-ba transferénsia podér atu halo desizaun no jestaun rekursu iha nível lokál. Avaliasaun ida-ne’e sei garante katak Munisípiu Manatuto iha kondisaun ne’ebé di’ak atu simu no jere podér hirak-ne’e ho efikásia no responsabilidade.

Melloria Prestasaun Servisu Públiku: Ho desentralizasaun, servisu públiku sira sei bele fornese ho efikásia liután no besik liután ba komunidade. Avaliasaun kondisaun mínimu sei ajuda ita atu garante katak munisípiu iha kapasidade atu fornese servisu esensiál sira hanesan edukasaun, saúde, saneamentu, no infraestrutura bázika ho kualidade ne’ebé di’ak.

Aumenta Partisipasaun Públika: Desentralizasaun promove partisipasaun sidadaun sira nian iha prosesu tomada desizaun. Ho kapasidade munisipál ne’ebé forte, Munisípiu Manatuto sei bele kria mekanizmu sira hodi envolve komunidade iha planeamentu no implementasaun programa dezenvolvimentu lokál.

Dezenvolvimentu Ekonómiku Lokál: Ho podér no rekursu ne’ebé desentraliza, munisípiu sei iha oportunidade atu dezenvolve no implementa estratéjia dezenvolvimentu ekonómiku lokál ne’ebé adekuadu ho nesesidade no poténsia Munisípiu Manatuto nian. Ida-ne’e sei kria oportunidade empregu no mellora moris di’ak ba sidadaun sira.

Transparénsia no Responsabilidade: Avaliasaun ida-ne’e mós nu’udar parte ida husi kompromisu governu nian ba transparénsia no responsabilidade. Ho avaliasaun ne’ebé rigorozu, ita bele garante katak rekursu no podér ne’ebé desentraliza sei uza ho matenek no ba benefísiu povu nian.

PAM mos Husu ba Diretores Servisu Munisipais sira ativu iha sesaun avaliasaun ida-ne’e atu nune’e bele la’o ho susesu no fornese rezultadu ne’ebé valiozu. Ha’u husu ba imi hotu atu fahe imi-nia koñesimentu, esperiénsia, no perspetiva hodi kontribui ba prosesu importante ida-ne’e.tenik PAM

#MEDIA PAM MANATUTO