Manatuto, 16 Jullu 2026 – Autoridade Munisipal Manatuto realiza Enkontru Conselho Consultivo Munisipal (CCM) Extraordináriu ho objetivu atu aprezenta no halo diskusaun kona-ba Planu Asaun Anual (PAA) tinan 2027.

Enkontru ne’e lidera husi Prezidente Autoridade Munisipal Manatuto no partisipa husi membru Conselho Consultivo Munisipal, reprezentante instituisaun governamentál relevante sira, autoridade lokal no parte interesada sira seluk.

Durante enkontru ne’e, ekipa tékniku aprezenta prioridade sira iha Planu Asaun Anual 2027, ne’ebé inklui programa no atividade sira atu responde ba nesesidade komunidade no suporta dezenvolvimentu munisipiu iha setor oioin.

Iha oportunidade hanesan, Autoridade Munisipal Manatuto mos Fo Tomada de Posse ba membru foun Conselho Consultivo Munisipal (CCM) hamutuk ema nain 8. Membru foun sira ne’e mai husi reprezentante juventude, reprezentante feto, reprezentante Conselho dos Katuas Lider Komunitáriu (CM-CLN), reprezentante organizasaun relijioza no reprezentante partidu polítiku sira.

Tomada de Posse ne’e marka hahú mandatu membru foun sira atu partisipa ativamente iha prosesu konsultasaun, fó kontribuisaun no rekomendasaun ba planeamentu no dezenvolvimentu Munisipiu Manatuto, tuir knaar no kompeténsia Conselho Consultivo Munisipal nian.

#MEDIA PAM MANATUTO