Manatuto – 02-07-2026–Secretária Munisipal ba Asuntu Planeamentu, Investimentu no Dezenvolvimentu Integradu (SECAM PIDI), Sra. Domingas Gilpia, ofisialmente loke programa lansamentu Sistema Digitalizasaun Livru Reklamasaun Konsumidor iha Autoridade Munisípiu Manatuto.

Programa ida-ne’e objetiva atu hadi’a transparénsia, efisiénsia no asesu ba mekanizmu hodi simu no jere reklamasaun husi konsumidor sira, liuhusi utilizasaun sistema dijitál ne’ebé bele fasilita prosesu atendimentu no monitorizasaun ba reklamasaun sira.

Reprezentante husi Direção Nacional Regulasaun Komersiál no Proteksaun Konsumidor, ne’ebé tutela husi Ministériu Komérsiu no Indústria, esplika katak objetivu husi implementasaun Sistema Eletróniku no Livru Reklamasaun Konsumidor mak atu fasilita sidadaun sira hato’o reklamasaun bainhira hetan problema iha atividade komersiál.

Tuir nia hateten, sistema ida-ne’e permite konsumidor sira hato’o reklamasaun karik sira hetan tratamentu ne’ebé la justo, hanesan presu sasán ne’ebé aas liu husi determinasaun, pesajen ka medisaun ne’ebé la loos, ka violasaun seluk ne’ebé prejudika konsumidor.

Nia hateten tan katak antes ne’e, ema barak hetan problema hanesan ne’e, maibé la hatene atu hato’o reklamasaun ba autoridade ne’ebé kompetente. Tanba ne’e, Ministériu Komérsiu no Indústria, liuhusi Direção Nacional Regulasaun Komersiál no Proteksaun Konsumidor, dezenvolve Sistema Eletróniku no Livru Reklamasaun Konsumidor atu sai mekanizmu ida ne’ebé simples, asesível no efisiente, hodi fasilita komunidade sira hato’o sira-nia reklamasaun no bele hetan akompanhamentu husi autoridade kompetente.

Secretária Planeamento Investimento Desenvolvimento Integrado(PIDI) iha nia Intervensaun katak Programa Ida ne Diak Tebes tamba bele tulun Komunidade sira liu husi Kompras Sasan sira iha Loja,tamba durante ne’e Supermercado sira Ladun tau atensau ba Presu no limitasuan Prazu,tamba ne’e ho Sosializasaun Ida ne Kosumidores sira bele komprende diak liu Tan.

Partisipa iha atividade ne’e mak, Diretor MTCI ,Diretor SERVE.IP, estudante no profesor sira husi instituisaun edukasaun sira iha Munisípiu Manatuto, ne’ebé hetan oportunidade atu rona esplika kona-ba importánsia direitu konsumidor, papel sidadaun sira iha, hato’o reklamasaun, no benefísiu husi implementasaun sistema dijitál ida-ne’e.

#MEDIA PAM MANATUTO