Manatuto Quarta-Feira-15 de Outobru-2025 — Prezidente Autoridade Munisipál Manatuto hamutuk ho Ministériu Administrasaun Estatál (MAE) organiza Semináriu Nível Munisípiu nian kona-ba Desentralizasaun iha Timor-Leste: Progresu, Dezafiu no Oportunidade iha munisípiu Manatuto, ajenda ona ba loron 16–17 Outubru 2025.

Tema sentrál ba semináriu ne’e mak “𝐃𝐚𝐥𝐚𝐧 𝐛𝐚 𝐏𝐨𝐝𝐞𝐫 𝐋𝐨𝐤𝐚́𝐥”, ho sub-tema “𝐇𝐚𝐦𝐞𝐭𝐢𝐧 𝐆𝐨𝐯𝐞𝐫𝐧𝐚𝐬𝐚𝐮𝐧 𝐋𝐨𝐤𝐚́𝐥 𝐛𝐚 𝐃𝐞𝐳𝐞𝐧𝐯𝐨𝐥𝐯𝐢𝐦𝐞𝐧𝐭𝐮 𝐈𝐧𝐤𝐥𝐮𝐳𝐢𝐯𝐮 𝐧𝐨 𝐒𝐮𝐬𝐭𝐞𝐧𝐭𝐚́𝐯𝐞𝐥 𝐢𝐡𝐚 𝐀𝐦𝐛𝐢𝐭𝐮 𝐃𝐞𝐬𝐞𝐧𝐭𝐫𝐚𝐥𝐢𝐳𝐚𝐬𝐚𝐮𝐧 𝐀𝐝𝐦𝐢𝐧𝐢𝐬𝐭𝐫𝐚𝐭𝐢𝐯𝐚 𝐇𝐨𝐝𝐢 𝐇𝐚𝐤𝐛𝐞𝐬𝐢𝐤 𝐆𝐨𝐯𝐞𝐫𝐧𝐚𝐬𝐚𝐮𝐧 𝐛𝐚 𝐏𝐨𝐯𝐮.”

Iha Munisípiu Manatuto, semináriu ne’e lidera husi Sra. 𝐌𝐚𝐫𝐢𝐚 𝐆𝐨𝐫𝐞𝐭𝐭𝐢 𝐌𝐚𝐫𝐪𝐮𝐞𝐬 𝐁𝐞𝐥𝐨, Diretora-Jerál ba Simplifikasaun, Modernizasaun, no Administrasaun Lokál (DG-SMAL)

Semináriu ne’epartisipa husi Membru Konsellu Konsultivu Munisipál, Sekretáriu Munisipal, Diretór Servisu Munisipál, Diretór Delegasaun Teritoriál, Xefe Departementu, Administradór Postu Administrativu, Xefe Servisu Lokál sira. Hafoin semináriu munisipál konklui, Prezidente Autoridade Munisipál sira sei kontinua fasilita sesaun hanesan iha nível Postu Administrativu sira. Semináriu ne’e hetan apoiu tékniku máximu husi ekipa PARTISIPA.

Entertantu, Governu Konstitusional da-IX Timor-Leste, liu husi Ministeriu Administrasaun Estatal Komprometidu atu kontinua implementa polítika desentralizasaun nu’udar meius ida atu hadi’ak governasaun, hasa’e prestasaun servisu públiku, hakbit komunidade lokál no hakbesik governasaun ba populasaun;

Ho promulgasaun Lei Nú. 23/2021 kona-ba Poder Lokál no Desentralizasaun Administrativa no Rezolusaun Governu Nú. 6/2025, 10 Fevereiru kona-ba “Execução da Estratégia de Descentralização Administrativa e de Instalação dos Órgãos Representativos do Poder Local 2025-2028”. Governu liuhusi Ministériu Administrasaun Estatál (MAE) ho Liña Ministériu relevante hirak ne’ebé deskonsentra ona kompeténsia ba autoridade munisipál halo ona progresu balun ba iha estabelesimentu institusional (segunda faze polítika desentralizasaun) iha nível Administrasaun Lokál Estadu hodi Hametin funsionárius kuadrus governasaun lokál nian.

Ho pensamentu prinsipal 2 iha leten maka Governu liu hosi Ministériu Administrasaun Estatal (MAE) realiza ona Semináriu Nasionál iha loron 15-16 setembru ho intensaun prinsipal atu Governu ho partes interessadas hotu iha nosaun/koñesimentu ne’ebé kle’an sobre polítika desentralizasaun no estabelesimentu poder lokál no atu lori pensamentu ne’e ba nível munisipal, Postus Administrativus, Sukus, Aldeias, ema hotu, maka Ministériu Administrasaun Estatal realiza ohin loron Semináriu Munisipal ida ne’e ho pensamentu ida hanesan kona-ba Desentralizasaun.

Seminário Munisipál ne’e sei fornese plataforma ba fahe informasaun, reforsa koñesimentu, no fó espasu atu hatene situasaun real husi implementasaun politika no prosesu desentralizasaun husi autoridade Munisipal, entidades, kuadrus no funsionárius Publikus. Ne’e atu reforsa ba planeamentu estratéjiku entre entidade Governu relevantes ho parte interessadas prinsipais.

Tan ne’e Semináriu Munisipal ne’e halibur ita hotu, Ofisial Senior husi Governu Sentral/MAE, Presidente Autoridade Munisipal ho nia estrutura, Postus Administrativus, Konsellu Konsultivu Suku, Forsa polítika, konfisoens religiosas, juventude no parseirus dezenvolvimentu ne’ebé servisu besik iha area Desentralizasaun nian hodi halo reflesaun kona-ba progresu ba programa, meius atu responde ba dezafius iha ámbitu desentralizasaun, no aliña prioridade ba futuru governasaun desentralizada iha Timor-Leste.

Ministériu Administrasaun Estatal (MAE) konsidera seminário nível munisipal ne’e importante tebes atu aliña prioridade no nu’udar preparasaun ida ba avaliasaun kondisaun mínimu husi autoridades Munisipal iha tinan 2026 hodi kumpri Rezolusaun Governu Nú. 6/2025 nian.

𝐎𝐛𝐣𝐞𝐭𝐢𝐯𝐮𝐬:

• Refleksaun sobre progresu, dezafius e oportunidade husi implementasaun polítika desentralizasaun durante ne’e.
• Aprezenta rezultadus husi avaliasaun funsionamentu servisu lokál no kondisaun existente Autoridades Munisipal nian ne’ebé hala’o husi MAE.
• Hametin liutan koordenasaun entre instituisaun governu sentral no Autoridade Munisipal hodi reforsa polítika no programa Desentralizasaun Administrativa no Poder Lokal.
• Identifika prioridade estratéjiku hodi reforsa kapasidade munisipiu prepara ba avaliasaun kondisaun minimu hodi prepara ba instalasaun Poder Lokál no Desentralizasaun Administrativa.

𝐑𝐞𝐳𝐮𝐥𝐭𝐚𝐝𝐮 𝐞𝐬𝐩𝐞𝐫𝐚𝐝𝐮:

• Iha komprensaun ne’ebe hanesan kona-ba progresu atual desentralizasaun iha Timor-Leste.
• Hatene progresu no lakunas husi avaliasaun ba funsionamentu servisu lokal no kondisaun ezistente Autoridade Munisipal ida-idak nian.
• Hatene progresu no lakunas husi implementasaun kompetensias mak delega ona ba Autoridade Munisipal iha ambitu desentralizasaun administrativa institusional.
• Hametin parseria servisu entre entidade governu nasional e parte interessada hodi re forsa prioridade Governu nian ba politika desentralizasaun administrativa.
• Iha ideia geral atu estabelese ekipa trabalho oinsa diskute forsa trabalho munisipal inklui reforsa kapasidade rekursu umanu hodi prepara autoridade munisipál sira ba avaliasaun kondisaun minimu no implementasaun poder lokal bazeia ba rezolusaun governu no. 6/2025, 10 Fevereiru “Execução da Estratégia de Descentralização Administrativa e de Instalação dos Órgãos Representativos do Poder Local 2025-2028”.

#MEDIA PAM MANATUTO