Manatuto 24-07-202″ lansamentu programa apoiu kondisional Bolsa da Mãe, Vise-Ministra Solidariedade Sosiál no Inkluzaun, Céu Brites akompaña husi Prezidente Autoridade Munisipiu Manatuto, Diretores Sentru Munisipais, Komandante Postu Cribas no Reprezentante Ministeriu Administrasaun Estatal, hala’o vizita domisiliariu ba Ema ho Defisiénsia (EhD) na’in 5 iha Suku Cribas, Munisipiu Manatuto, Kuarta-feira (24/07).
Entre EhD na’in 5 ne’e, Edoardo Manuel iha Aldeia Ranac mak iha kondisaun vulneravel tebes no foin ba dahuluk hetan apoia ai-han. Entretantu defisiénsia Agustinho Soares, Horsania dos Reis Alves, Vicente Soares no Carolina Soares husi Aldeia Athoc, hetan ona apoiu terapia husi Centro Nacional Reabilitação (CNR), maibé daudaun ne’e sira presiza nafatin apoiu liuliu ba sira-nia kadeira roda no mós apoiu sira seluk tan ne’ebé bele ajuda sira iha situasaun defisil.
Entretantu defisiénsia Vicente Soares, daudaun ne’e iha hela estudu iha ensinu superior UNTL, tanba ne’e Vise-Ministra husu ba nia atu vizita CNR hodi halo terapia ba ninia situasaun defisiénsia.
Iha vizita ne’e MSSI apoia mós ai-han no sasan komplementar ba EhD na’in 5 ne’e no ekipa enkoraja familia atu tau-matan ho didi’ak ba sira-nia membru familia ne’ebé iha kondisaun defisiénsia.