Manatuto–7-04-2025, Prezidente da Autoridade Munisípal de Manatuto Sr.Luis Inacio Henrique Fernandes hamutuk ho estrutura Munisipál Manatuto hetan Vizita husi ekipa delegasaun husi Provínsia Hunan ne’ebé lidera husi Sra. 𝐖𝐚𝐧𝐠 𝐋𝐢𝐰𝐞𝐧, Vise Prezidente Asosiasaun Povu Provínsia Hunan ba Amizade ho Nasaun Estranjeiru sira, inklui reprezentante xave sira hanesan Sra. 𝐆𝐮𝐨 𝐋𝐚𝐲𝐮𝐧, Ofisiál Nivel II husi Sidade Yiyang, no Sr. 𝐋𝐢 𝐃𝐞𝐧𝐠𝐤𝐞, Adjuntu Diretór Divizaun I hosi Gabinete Jerál Governu Provinsiál Hunan nian, akompaña husi Ministériu Administrasaun Estatál (MAE) reprezenta husi Xefe Gabinete, Sr. 𝐁𝐞𝐧𝐢𝐠𝐧𝐨 𝐇𝐮𝐦𝐛𝐞𝐫𝐭𝐨 𝐝𝐚 𝐂𝐫𝐮𝐳 no Asesor Prinsipal, Sr. 𝐀𝐛𝐢𝐥𝐢𝐨 𝐉𝐨𝐬𝐞́ 𝐂𝐚𝐞𝐭𝐚𝐧𝐨, hala’o enkontru ho Prezidente Autoridade Munisípiu Manatuto, Sr. 𝐋𝐮𝐢𝐬 𝐈𝐧𝐚𝐜𝐢𝐨 𝐇𝐞𝐧𝐫𝐢𝐪𝐮𝐞 ho dirijente relevante sira, iha Salaun Administrasaun Munisípiu Manatuto.

Objetivu prinsipál husi enkontru ne’e atu avalia progresu husi akordu kooperasaun ne’ebé hala’o ona entre Provínsia Hunan no Munisípiu Manatuto dezde tinan 2014 to’o 2025 no atu diskute kona-ba planu kooperasaun sira ne’ebé presiza realiza iha tempu oin mai.

Iha sorumutu ne’e, Prezidente Autoridade Munisípiu Manatuto, Sr. Luis Inacio Henrique, hato’o bem-vindu ba delegasaun no hato’o agradesimentu sinseru ba apoiu kleur ona ne’ebé Provínsia Hunan fó ba dezenvolvimentu Manatuto nian.

Iha sorumutu ne’e, parte rua (Provínsia Hunan no Munisípiu Manatuto)diskute kona-ba importánsia atu mantein komunikasaun regulár hodi fahe koñesimentu no esperiénsia sira ne’ebé bele kontribui ba hamenus kiak, dezenvolvimentu rurál no governasaun.

Parte rua mós kompromete atu fasilita vizita mutual, programa interkámbiu no estudu komparativu, atu hametin liután sira-nia parseria no ligasaun ema ba ema ne’ebé metin.

Hafoin enkontru, delegasaun halo viajen ba Aldeia Rembor-Manatuto, hodi asiste asinatura akordu kooperasaun foun ida entre Sidade Yiyang (Provínsia Hunan, Repúblika Populár Xina) no Aldeia Rembor.

Akordu ne’e ho objetivu atu kontinua hametin relasaun amizade bazeia ba entendimentu no kooperasaun mútua. Parte rua konkorda atu promove interkámbiu no kolaborasaun iha área sira hanesan ekonomia, komérsiu, edukasaun, no kultura.

#MEDIA PAM MANATUTO