Hatutan.com, (13 Dezembru 2021), Díli—Udan-boot loron rua tuituir malu, Sabadu-Domingu (11-12/12/2021), iha Munisípiu Manatuto, lori trauma boot ba komunidade sira hela besik mota Laklo tuun to’o Manatuto-Vila.

Udan-boot loron hirak liubá afeta maka’as ba komunidade nia hela fatin, animal-hakiak no ai-horis sira, tanba mota komesa sobu ona moru protesaun no halo bee-mota suli tama to’o komunidade sira nia horik-fatin.

Administradór Munisípiu Manatuto, Bernado Lopes, husu ba Governu sentrál liuhosi Ministériu Obras Publika (MOP) ho Ministériu Agrikultura no Peska (MAP) atu toma medida emerjénsia rezolve moru protesaun iha Mota Manatuto nian tanba fó ameasa ba povu nia vida, inklui ameasa ba povu nia kintál, natar no ai-horis sira.

Ba Hatutan.com via telefónika, Segunda (13/12/2021),  Administradór Bernado Lopes, informa katak mota-boot loron rua tuituir malu sobu daudaun ona moru protesaun ne’ebé satan bee-mota ba komunidade sira-nia horik-fatin ho distánsia metru 100-resin.

“Ema mate laiha maibé material komunidade nian barak mak estragus no bee nalihun tama to’o komunidade uma komunidade, inklui mos estraga natar balun ona,” Administradór Bernado Lopes haktuir.

Autoridade Munisípiu Manatuto halo esforsu hodi evakua komunidade sira hamutuk ho sira-nia dokumentu no sasán importante sira ba iha fatin seguru hodi bele asegura sira-nia vida to’o situasaun normal mak komunidade  fila ba sira ida-idak nia hela fatin.

Parte kompetente mós apoiu ona hahán no sasán nesesidade báziku sira seluk ba komunidade tanba maioria husi família afetadu enfrenta problema relasiona ho ai-han tanba hetan estragus husi inundasaun ne’e.

“Ami halo ona levantamentu ba família afetadu sira no provizoriamente ami rejista uma-kain hamutuk 10 no ami sei kontinua halo identifikasaun iha loron tuir mai,” nia hateten.

Autoridade munisipál ne’e hateten, molok ne’e sira-nia parte halo ona alarme públiku ba iha komunidade tomak Manatuto atu nafatin atensaun másimu ba avizu no alarme sira husi Governu liuhusi Sekretáriu Estadu Protesaun Sivíl (SEPS) ho Serbisu Meteorolojia no Jeofízika Timo-Leste nian kona-bá previzaun tempu.

Autoridade Munisípiu Manatuto kontinua halo esforsu atu asegura komunidade sira husi dezastre natural ne’ebé iha liu husi informasaun públiku ne’ebé parte autoridade munisipál komunika direita ho administradór postu, xefe suku no xefe aldeia sira.