Manatuto, 12 Janeiru 2024,

Sua Eselénsia Ministru Administrasaun Estatál, Tomás do Rosário Cabral, Sesta (12/01), fó Tomada Posse ba Prezidente Autoridade Munisipál Manatuto, Luís Inácio Henriques Fernandes, hodi troka Administradór Munisípiu Manatuto sesante, señor Bernado Lopes.

Luís Inácio Henriques Fernandes, hasai kursu lisensiadu iha area Gestaun no Ekonomia, no dezempeñu funsaun hanesan Inspetor no Auditor Interno no Diretor Jeral Ministériu Komersiu Industria no Ambiente, durante IV, V,VI, VII no VIII Governu Kontitusional.

Nune’e mós, S.E. MAE, Toma Posse ba Sekretáriu Munisípiu no Diretores Servisus Munisipais Manatuto nian, inklui Administradór Postu Administrativu Na’in Lima, hanesan, señor José Ramos, ezerse kargu no funsaun hanesan Administradór Postu Administrativu Barique, Autoridade Munisipál Manatuto, señor Ernesto Clementino dos Reis Ferreira Sarmento, ezerse kargu no funsaun hanesan Administradór Postu Administrativu Laclubar, Autoridade Munisipál Manatuto, señor Franscisco Jacinto Ximenes, ezerse kargu no funsaun hanesan Administradór Postu Administrativu Laleia, Autoridade Munisipál Manatuto, señor José Pedro da Cunha, ezerse kargu no funsaun hanesan Administradór Postu Administrativu Manatuto, Autoridade Munisipál Manatuto, no señora Terezinha da Costa Moniz, ezerse kargu no funsaun hanesan Administradór Postu Administrativu Soibada, Autoridade Munisipál Manatuto.

Seremónia tomada posse ne’e, hala’o iha Salaun Igreja Santo António Manatuto Villa, ho tema “Impulsionar a Decentralização para Promover a Coesão Territorial.”

Iha diskursu, S.E.MAE, Tomás do Rosário Cabral, husu ba Sekretáriu Munisípiu no Diretores Servisus Munisipais, atu servisu hamutuk ho Prezidente Autoridade, hodi lori susesu ba Munisípiu Manatuto.

“Ohin Ita-Boot sira halo juramentu iha Amu nia oin, ka’er ba Biblia, la-iha ema ida atu kontra desizaun Autoridade nian, Autoridade iha diretu atu informa ba Ami ka informa ba Primeiru Ministru, se mak la obedese di’ak liu Ita hasees lai, tanba Povu presiza dezenvolvimentu”.S.E.MAE apela.

Iha fatin hanesan, Prezidente Autoridade Munisipál Manatuto, Luís Inácio Henriques Fernandes, promote sei assume kna’ar ne’e ho responsabilidade hodi tane no serbí fi’ar ne’ebé haraik ba Nia, tanba ne’e, la haluha hato’o agradesimentu wa’in ba sua eselénsia Primeiru Ministru, Kay Rala Xanana Gusmão, ne’ebé depozita konfiansa ba Nia.

“Ha’u sei assegura duni prioridade polítika no programa Governu Konstitusional Da-sia nian, nune’e bele lori Povu Manatuto ba moris ne’ebé di’ak liu, no lori Manatuto nu’udar Munisípiu ne’ebé dezenvolvidu iha setor hotu-hotu”, Prezidente Autoridade Munisipál Manatuto ne’e promote.

Enkuantu, iha Seremónia Tomada Posse ne’e, marka mós prezensa husi S.E.Vise MAE, Jacinto Rigoberto Gomes de Deus, S.E. SEATOU, Germano Santa Brites Dias, S.E.SEDL, Mateus Wylfredos dos Santos Tallo, Membru Governu no Deputadu, S.E. Embaixador Repúblika Popular China iha Timor-Leste ho S.E.Embaixadora Portugal, Prezidente Autoridade Munisípiu Ainaru, Prezidente Komisaun Funsaun Públika ho Estrutura, Veteranu, Komandante PNTL Munisípiu Manatuto, Diretores Jerais no Nasionais MAE, Padre no Mandre, Lia Nain, Juventude, Lideransa Komunitariu, no mós Povu Manatuto.