Manatuto – 6 de Julhu 2026, Prezidente da Autoridade Munisipal (PAM) Sr.Luis Inacio Henriques Fernandes ho ekipa tun direta ba terenu hodi observa no avalia situasaun depois de insidente ne’ebé akontese iha kalan iha Seurtulan, Suku Orlalan Postu Administrativu Laclubar, tamba mosu dezintedimentu entre Komunidade suku Fatumakerek no Orlalan ne’ebé afeta komunidade balun halo estragus ba uma residente sira.

Vizita ne’e nia objetivu atu haree diretamente impaktu husi akontesimentu, nune’e koordena ho autoridade relevante sira hodi identifica nesesidade urjente hodi fó resposta apropriada ba família afetada sira.

Iha tempu hanesan, Komandu PNTL Munisípiu Manatuto halo asaun lalais hodi evakua no asegura suspeitu sira ne’ebé presuntamente envolve iha insidente refere, atu fasilita prosesu investigasaun tuir lei no garante ordem no seguransa públika.

Durante vizita ne’e, PAM Manatuto mos hato’o apoiu emerjénsia ba família afetada sira no reafirma katak Autoridade Munisipal sei kontinua serbisu hamutuk ho instituisaun kompetente sira hodi asegura resposta lalais, apoiu umanitáriu no kontribui ba estabilidade no seguransa iha área refere.

Autoridade Munisipal apela ba komunidade atu mantein kalma, respeita prosesu legal ne’ebé lao hela no halo koperasaun diak ho autoridade kompetente sira durante Processu investigasaun.

Autoridade Munisipal Manatuto kontinua halo avaliasaun no koordena ho instituisaun relevante sira hodi fó apoiu emerjénsia ba família afetada sira no identifica nesesidade prioritária iha área refere.

Tuir dadus ne’ebe Autoridade Munisipiu Manatuto hetan husi observasaun iha terenu, insidente ne’e afeta uma kain hamutuk 11, kompostu husi uma kain 7 ne’ebé hetan estragus todan no uma kain 4 ne’ebé hetan estragus kmaan.

#MEDIA PAM MANATUTO