1. Jeografia
Manatuto mak munisípiu ida husi Timor-Leste, ne’ebé lokaliza iha parte leste do capital Timor. Munisípiu ne’e halo fronteira ho Munisípiu Baucau no Viqueque (este), Tasi Timor (sul), Munisípiu Dili, Aileu no Manufahi (oeste) no Tasi Estreito Wetar (norte). Munisípiu referido iha postu administrativu 6 : Natarbora, Soibada, Laclubar, Manatuto, Laclo no Laleia ne’ebé inklui 31 suku.
Demográfikamente, Manatuto iha total de populasaun hamutuk 48,876 (tuir projesaun 2019) no densidade populasaun mak 27,36 ba área 1,785.95 km2. Grupu de populasaun ida ne’e, koalia lian : Tetun, Galoli, Idate Habun no Dadua.
2. Toponímia
Lia-fuan Manatuto etimologicamente, mai hosi lian Galolen ne’ebe significa; “Manu (galo) + Nutu (pica) eh iha Tetum, Manu-Futu”. Ho tempo nia muda ba Manatuto. Maibe, iha balu intrepreta lia-fuan ne’e hosi forma seluk. Buat hotu hanesan versão ne’ebe tenki considera. Conforme narração balu iha tempo uluk iha reino rua; Sau-Raha (agora Soraha), no ida seluk Sau-Lor (agora Saulidun). Iha sira nia aktividade lorloron,.sira nain rua moris keta-ketak, Grupo Sau-Raha hela iha foho Soraha, Grupo Sau-Lor hela iha foho Sauhuhun. Sira nain rua iha liurai idaidak nian. Sira nain rua maun-alin, Loron ida, hosi loro-monu, mai bero ida ho ema grupo ida, iha bero nia tutun, iha manu aman ida. Tuir dalan manu ne’e kokoroek, hodi buka fatin ida atu ema bele simu sira. Maibe laiha ema ida ne’ebe mai hasoru sira, Molok raihun-mutin, sira hare fatin ida ho naran Hiri latar welau. No manu-aman ne’e continua kanta no verso ida ne’e; “koko-roek- koe, Labuta rai, rai mak ne’ebe, Labuta rai, reinu mak ne’ebe“. Nune’e mos ba dala rua, Ba dala tolu, manu aman ida seluk iha foho-oan Malarahun, responde nune’e; “koko-roek-koe, Labuta rai, nia rai mak ne’e, Labuta rai, nia reinu mak ne’e “. Wainhira rona tiha lia-fuan hirak ne’e sira ne’ebe iha bero, hakbesik ba tasi-ibun, Hafoin ne’e, sira ba foho-oan Malarahun. Tuir sira konta foho-oan ne’e mak fatin original Manatuto nian.
3. Istória
Tuir istória, antes Portugues sira estabelese sira nian autoridade iha rai Manatuto, iha ona autoridade tradisional ne’ebé ukun. Iha tinan 1698, Governo Portugues introdús sira nia autoridade, liu husi Governador António Coelho Guerreiro. Iha tinan ne, sira começa halo intervensaun ba Autoridade tradisional sira iha Timor, inklui iha Manatuto. Iha loron 20 de Abril de 1859, liu husi Governador Afonso de Castro estabelese 11 Distritu, Manatuto mos sai hanesan disrtito ida ho nia naran Distritu de Manatuto Vila, no nia sede iha Manatuto ne’ebé kompostou husi reino Bubur-Susso, Kablaqui, Fulau, Faturo no Turiscai. Liu tiha Segunda Guerra Mundial, Governador Oscar Ruas muda komando militar ne’e transforma fali ba Circuscriação Civil ne’ebé kompostu husi postu administrativu civil Barique, Fatuberlihu, Laclo, Laclubar no Laleia. Iha tempu okupasaun indonésia, Manatuto sai hanesan Distritu no ikus mai sai hanesan munisípiu.
4. Klima
Manatuto em geral, iha clima tropical. Maibe, iha mos clima ho temperatura media iha centro-sul (Laclubar e Soibada) no seluk ho clíma húmido (Laclubar, Manatuto/Cribas, Barique e Soibada). Clíma maran mak iha Norte (Manatuto-Vila, Laleia e Lacló).
5. Pontu Interese
Pontu interese husi Manatutu mak hanesan: Be tudak Cribas no Igreja Laklubar. Munisípiu ne’e rasik, kuñesidu ho selebrasaun anuál ne’ebé mak hala’o iha tempu bo’ek, kuñesidu ho dansa suru bo’ek. Hahan tradisionál mak hanesan Balixaun.
