Sua Eselénsia Sekretáriu Estadu Kooperativa (SEKoop), Eng., Arsénio Pereira da Silva, M. Agr., fó pose ba Estrutura Konsellu Diretiva no Konsellu fiskal Kooperativa Uniaun Kréditu RARAWAKO, HALIMAHON, HEFAN no HUDEF iha Salaun Parokiál Laleia, Postu Administrativu Laleia, Munisípiu Manatuto, iha Kuarta-Feira dader.

Antes transforma-an sai kooperativa, hahú uluk ho Grupu 𝙍𝙖𝙞 𝙉𝙤 𝙀𝙢𝙥𝙧𝙚𝙨𝙩𝙖 𝙊𝙨𝙖𝙣, ne’ebé maka fasilita husi World Vision Timor-Leste (WVTL), liu husi programa 𝙍𝙚𝙯𝙞𝙡𝙞𝙚𝙣𝙩𝙚 𝙆𝙡𝙞𝙢𝙖́𝙩𝙞𝙠𝙪 𝘽𝙖 𝙀𝙢𝙖 𝙃𝙤𝙩𝙪, ne’ebé hahú iha tinan 2020.

Hafoin fó pose, Sua Eselénsia Sekretáriu Estadu Kooperativa iha ninia diskursu haktuir katak kooperativa maka sai mos hanesan meiu ida bele fó solusaun ba dudu kreximentu ekonomia iha baze. Hodi nune’e mobiliza tan komunidade sira seluk ne’ebé seidauk envolve an, atu involve an mos iha movimentu kooperativa sira.

“Hau fó parabéns ba Ita bo’ot sira ne’ebé maka ohin simu pose ona, ba oin tenki tau importansia ba Kooperativa. Hirak ne’ebé sai ona membru kooperativa no hetan fundu husi kooperativa tenke halo kooperativa hanesan fonte rendimentu primeiru, par depoiz bele apoiu ekonomia familiár no dezenvolve kooperativa ne’e rasik. Bainhira ema hotu envolve an ona iha kooperativa, krize ruma mosu mos ekonomia baze sei la nakdoko” subliña SEKoop.

Nune’e mos Prezidente Autoridade Munisípiu Manatuto, Luis Inácio Henrique Fernandes, dezafia ba dirijenti sira atu kuidadu no dezenvolve kooperativa ba oin, oinsa mak bele fó benefísiu ba ninia membru no komunidade enjerál. Rekomenda mos parte Sekretaria Estadu Kooperativa (SEKoop) atu kontinua akompaña no monitoriza nafatin sira nia atividade lorloron nian.

Iha tempu hanesan, Prezidenti Kooperativa ha’at husu ba SEKoop atu kontinua fasilita formasaun kontinuasaun hanesan, kontabilidade, jestaun no finansa ba jestór sira, oinsa maka sira bele jere ho di’ak sira nia Kooperativa atu bele iha sustentabilidade.

Entretantu Kooperativa Kréditu Uniaun HALIMAHON ho ninia membru hamutuk ema nain 26, kompostu husi feto 25 no mane 1, no RARAWAKO ninia membru hamutuk ema nain 27, kompostu husi feto 24 no mane 3. Kooperativa rua ne’e mai husi Postu Administrativu Laleia, Municípiu Manatuto. Kooperativa Kréditu Uniaun Haburas Ekonomia Familia (HEFAM) ninia membru hamutuk ema nain 18 kompostu mane 9 no feto 9, husi Suku Uatulari no Kooperativa Hametin Unidade Dezenvolvimentu Ekonomia (HUDEF) membru hamutuk ema nain 16, kompostu husi feto 7 no mane 9, husi Suku Ossoala, Postu Administrativu Vemasse Munisípiu Baucau.

Marka Prezensa iha serimónia ne’e maka hanesan, Reprezentante Prezidente Autoridade Munisípiu Baucau, Diretór-Jerál SECoop, Eng Olderico Lopes, Diretor Nasionál WVTL, Administradór Postu Administrativu Vemasse no Laleia, Amo Pároku Laleia, Komandante PNTL Postu Administrativu Laleia no líder komunitária sira.

#Média SECoop#