Manatuto, 1 Jullu 2026 – Prezidente Autoridade Munisipal Manatuto Sr.Luis Inacio Henriques Fernandes, Akompanha Husi Sekretario Asuntos Sosiais Sr. Natalino Martins Carvalho ,Diretor Fiskalizasaun,Diretor Finansas, Xefi Dep.Finansas, Responsável merenda Eskolar Munisipiu Manatuto, ohin tun diretamente ba terenu hodi halo observasaun no monitorizasaun ba kondisaun implementasaun programa Merenda Eskolar iha eskola balun iha munisípiu Manatuto.

Vizita ida-ne’e hala’o tuir informasaun ne’ebé publika iha media sosial iha loron hirak liubá, ne’ebé dehan katak estudante sira la simu merenda eskolar durante loron 22. Atu garante katak informasaun ne’ebé sai ba públiku loos no bazeia ba dadus reais, Prezidente Autoridade Munisipal Sr.Luis Inacio Henriques Fernandes deside atu tun rasik ba fatin hodi halo verifikasaun direta.

Rezultadu verifikasaun mos hatudu katak iha Eskola hasoru deit atrazu iha implementasaun programa merenda eskolar, tamba mudansa ba iha forneseedor foun no prosesu administrativu balun. Maibé, situasaun ne’e la signifika katak estudante hotu-hotu la simu merenda eskolar durante loron 22 hanesan alegasaun ne’ebé publika iha media.

Prezidente Autoridade Munisipal reafirma katak Governu Munisipál sei kontinua halo akompanhamentu no monitorizasaun regular atu garante programa Merenda Eskolar lao ho di’ak, transparente no fó benefísiu ba estudante sira hotu.

PAM Manatuto apela ba públiku atu sempre uza informasaun ne’ebé konfirmadu no fonte ofisiál sira molok fahe ba ema seluk, atu evita interpretasaun sala no informasaun ne’ebé bele kria preocupasaun iha sosiedade.

#MEDIA PAM MANATUTO