𝐌𝐚𝐧𝐚𝐭𝐮𝐭𝐮, 𝟏𝟕 𝐉𝐮𝐧̃𝐮 𝟐𝟎𝟐𝟓— Prezidente da Autoridade Munisipal de Manatuto Sr.Luis Inacio Henriques Fernandes akompanha husi Xefi Gabinete Hendrik Soekendro, Director SMASA, Director, EDTL-EP Munisipiu, tékniku BTL.EP ho EDTL.EP hala’o Enkontru ho Sua Eselénsia Sekretáriu Estadu Eletrisidade, Água no Saneamentu Santos Noronha, akompaña husi Xefí Gabinete, Vise-Prezidente Komisaun Ezekutiva, Be’e Timor-Leste, Empreza Públika (BTL, E.P) no ekipa tékniku, hodi hadi’a di’ak liutan liña koordenasaun iha setór elétrisidade no be’e-moos.

Iha intervensaun Sekretáriu Estadu Santos Noronha hateten, setór eletrisidade, be’e no Saneamentu importante tebes tanba liga ba ema nia moris tan ne’e banhira ita la jere no la dezenvolve ho di’ak mak sei afeta ba setór sira seluk tanba, setór elétrisidade, be’e no saneamentu mak sai hanesan sentrál ba setór hotu-hotu no sentrál ba dezenvolvimentu nasaun nian, nune’e tenke fo atensaun másimu ba setór refere.

SEEAS mós akresenta liutan katak, durante ne’e iha Instituisaun barak mak servisu iha setór be’e nian maibé seidauk garante sustentabilidade bé-moos tanba, laiha orsamentu banhira ekipamentu ruma a’at ka sistéma ladi’ak hodi halo manutensaun no rezultadu ikus abandona hela, no nia impaktu ba fali komunidade sira, tanba labele hetan asesu ba iha bé-moos.

Membru governu nemós husu ba liña ministeriais sira hotu husi nasionál to’o iha Munisipiu, Postu Administrativu no Suku atu bele tau forsa no hanoin hamutuk hodi dezenvolve iha setór eletrisidade, be’e no saneamentu nune’e bele garante ninia sustentabilidade.

Enkontru ida ne’e, partisipa husi Vise-Prezidente BTL.EP, Prezidente Autoridade Munisípiu Manatutu, Diretór EDTL.EP, BTL.EP, SMASA ho PNDS Munisípiu Manatutu, Vise-Prezidente BTL.EP, Tékniku husi DNRE no DNRAS Tékniku husi BTL.EP ho EDTL.EP.