𝐃𝐢́𝐥𝐢, 𝟐𝟖 𝐎𝐮𝐭𝐮𝐛𝐫𝐮 𝟐𝟎𝟐𝟓, Governu atribui Tersa-Feira ne’e, lisensa ba empreza hat atu halo prospesaun no peskiza minerais metáliku no non metáliku iha Munisípiu Manatuto,Covalima, Aileu,Viqueque no Rejiaun Autónoma Oecusse. Empreza sira sei halo peskiza rekoñesimentu hodi deskobre distribuisaun rekursus, mapeamentu, foti amostra hodi sertifika kualidade no levantamentu dadus prelimináriu hodi relata ba ANM, atu halo servisu detalladu, inklui mapeamentu no avaliasaun inisiál ba impaktu ambientál, hodi projeta ba dezenvolvimentu.

Empreza Estatal Murak Rai Timor, E.P. sei halo prospesaun no peskiza ba minerais presiozu no komúm iha Suku Licore, Bahadic husi Postu Administrativu Laclo, Suku Sananain, Funar, Batara no Orlalan husi Postu Administrartivu Laclubar no Suku Aiteas ho Kribas, husi Postu Administrativu Manatutu Vila. Empreza Timor Orbit Persada sei halo prospesaun no peskiza ba Osan Mean no Metais Komúm iha Suku Bobmeto, Sub Rejiaun Oesilo no Suku Bobokase, Costa no Naimeco ne’ebé pertense ba Sub Rejiaun Pante Makassar.

Relasiona ho projetu ne’e, Prezidente Autoridade Munisipal Manatuto Sr.Luis Inacio Henrique Fernandes deklara prontidaun atu apoia empreza sira, no apela kooperasaun husi komunidade atu fó susesu ba investimentu ne’e, hodi impulsiona dezenvolvimentu ekonómiku.

Sua Eselénsia Ministru Petróleu no Rekursus Minerais, Francisco da Costa Monteiro tenik katak, MPRM ho entidade tutela sira kontinua assume iha promosaun ba potensialidade, hodi atria investimentu ne’ebé bele komplementa, rendimentu husi pertóleu no gás ne’ebé durante ne’e finansia ekonomia nasionál. Investimentu empreza husi Indonézia no Xina iha Timor-Leste, manifesta konfiansa ba rejime legal, administrativu, sistema ne’ebé hafasil investimentu, inklui propetividade jeolójika.

Atu kontinua promove Timor-Leste nia rekursu petrolífera no minerais, Sua Eselénsia Ministru Monteiro anunsia katak, iha fulan Novembru, ANM, I.P., no ANP, I.P. sei hamutuk no Ministériu Koordendór Assuntus Ekonómiku atu organiza simeira ba enerjia no minerais no planeia lansa bloku explorasaun, hodi buka rendimentu komplementár ba estadu.

Ba Sua Eselénsia Primeiru Ministru Interinu, Mariano Assanami Sabino, investimentu empreza internasionál sira la’os puramente negósiu, maibé manifesta sentidu soliedariedade, fraternidade humana no irmanidade. Apela mos ba empreza sira atu envolve ativamente iha prosesu konstrusaun estadu no sai parte integrante iha história Timor-Leste nian, hodi haforsa liu-tan ho adezaun Timor-Leste ba ASEAN, iha loron 26 fulan Outubru.

Ho atribuisaun lisensa ba empreza hat ne’e, Autoridade Nasional Minerais – ANM, I.P. konsege emite ona lisensa ba prospesaun no peskiza ba minerais metáliku no non metáliku, hamutuk 51 hodi autoriza empreza sira halo investimentu no deskobre potensialidade rikusoin iha rai-okos.

#MEDIA PAM MANATUTO 2025