Ohin ami nia prejensa iha Manatuto nia objetivu atu aprejenta ami nian a’an ba sosiedade liliu ba oan sira ne’ebé sai futuru ba ita nia rai no ita nia Estado, tamba ejisténsia Forsas Armadas hahu kedas iha 2001 antes ita restaura ita nia Indenpendénsia iha 20 de maio 2002, portantu tinan ida antes ita nia Forsas Armadas hambrik iha rai Aileu, maibé liu tinan 2024 ona kuaze Forsas Armadas nia prejensa iha ita nia sosiedade bele dehan katak menus tebtebes, depois ukun a’an Forsas Armadas hela deit iha sidade ne’eba e Forsas Armadas sai fali deit ba tasi balun, maibé la tun mai iha povu nia le’et, portantu ita fila fali ba prosesu ita nia istória libertasaun, iha ne’eba ita iha lema ida, ne’ebé hatete povu mak be’e FALINTIL mak ikan FALINTIL bele moris tamba be’e iha nune’e mós Forsas Armadas iha tenke iha povu ida, maibé depois indenpendénsia Forsas Armadas nia prejensa iha povu nia le’et menus tebtebes mukit tebes liliu iha area remotas, dehan Vise Xefe Estadu Maior Jenerál FALINTIL-Forsa Defeza Timor-Leste (F-FDTL) Major Jenerál Calisto Santos “Coliati” liu husi dialogu ho komunidade Profesores nomós estudantes sira iha salaun EBC Beadi Manatuto Villa.

Nia hatutan tamba ida ne’e maka ita nia Xefe Estadu Maior Jenerál F-FDTL Tenente Jenerál Falur Rate Laek, nia deside hahu kedas iha Janeiru 2024, Forsas Armadas tenke hakbesik a’an ba komunidade tenke halo programa ruma hodi tun ba komunidade nia le’et e espesial ba eskola sira, tamba iha eskola maka baze ba konstrusaun de Estadu no Konstrusaun ba Nasaun eskola maka futuru liders rai ida ne’e ninian, nasaun ida ne’e ninian, tamba ida ne’e maka lori ami ohin mai to’o iha ita bo’ot sira nia le’et, tenik nia.

Ba ida ne’e hau lori Forsas Armadas tomak nia naran hato’o agradese wain ba sr Profesores sira, ita bo’ot sira maka eroi ba Segunda faze da Libertasaun da patria, ita labele haluha katak Nasaun ida hambrik nia baze maka edukasaun, laiha edukasaun laiha ema matenek, kuando laiha ema matenek ita labele liberta ita nia rai, ita nia istória hatudu desde ita nia beiala sira halo funu hasoru kolonialismu.

Tamba ida ne’e maka ami prejensa ohin iha ne’e liuliu husu ba oan sira imi maka futuru rai ida ne’e ninian imi maka Nasaun ida ne’e ninian tenke respeita ba ita nia edukadores sira, ne’eduni husu ba imi estudantes sira atu estuda ho diak tenke badinas ba eskola no lalika mete iha grupo arte marsiais.

Iha fatin hanesan Xefe Divijaun Kooperasaun Sivil Militár Tenente Koronel Valerio Valente hateten objetivu husi Vijita ida ne’e maka planu husi ami nia Xefe Estadu Maior Jenerál hahu kedas iha fulan Janeiru, ami inisiu kedas husi fronteira mai to’o iha Same no agora hahu fali husi ne’e ba to’o iha parte Leste, ne’ebé ami nia misaun agora dadauk hanesan apoiu sosial hanesan fahe sasan nesesidade eskola nian ba estudantes sira nomós konta itoan istória prosesu funu nian ba alin estudantes sira para ita nia oan sira bele komprende konabá istória Timor Nian.

Tan ida ne’e mak ohin ami mai atu aproxima ba ita nia oan sira atu hatene diak liutan konabá istória no ohin ami mai, ami la lori buat barak ou sasan ne’ebé ho nia valor bo’ot, maibé ami mai lori buat ne’ebé ke atu ajuda ita nia oan sira konabá prosesu edukasaun nian, tamba ida ne’e mak ohin ami lori hela ekipamentus material eskola nian hanesan, pasta, lapijeira, livro, ropa jinastika nomós ho livru istória ne’ebé hakerek husi ita nia aman funu nain sira ne’ebé agora sei moris.

Delegasaun ne’ebé maka akompanha vijita Vise Xefe Estadu Maior Jenerál F-FDTL Major Jenerál Calisto Santos “Coliati” hanesan Xefe Divijaun Kooperasaun Civil Militár Tenente Koronel Valerio Valente, Komandante Segundo Batallaun Sul Major Helio Filipe Dias Quintas, Ofisial Operasaun, Ofisial CENOP, Ofisial Lojistika, nomós hetan seguransa husi FALINTIL-FDTL Postu Manatuto villa no atividade ne’e hetan, Partisipasaun maximu husi Prezidente da Autoridade Municipal de Manatuto, Sekretário dos Asuntos Sociais e das Organizasoes Komunitarias, Profesores,Estudante no komunidade.